1Cor 13 | MHL | STEP | I mua wia kookalowa nain maiyem. Feenap, yo owow unowa opora wiar amisarep aakuninen-na ne Mua Maneka ensel opora nain pun wiar amisarep aakuninen-na, ne yo mua me wia kookalinen-na yo opora aakuniyem nain oram saarik efar arinon. Ununa ne oka momor paowa saarik, aluowa-ke maneka ne kemena marew.

1 Corinthians 13

Wia kookalowa sira

1 I mua wia kookalowa nain maiyem. Feenap, yo owow unowa opora wiar amisarep aakuninen-na ne Mua Maneka ensel opora nain pun wiar amisarep aakuninen-na, ne yo mua me wia kookalinen-na yo opora aakuniyem nain oram saarik efar arinon. Ununa ne oka momor paowa saarik, aluowa-ke maneka ne kemena marew. 2 Ne Mua Maneka amisa yieya opor kokot aakuninen-na ne yo o iiriw maa pipilimep wuak nain yo kema pukep eliw wiar mainen. Ne Mua Maneka kekanowa makena wiar naemi mainen-na, “Ni ema unowa fain epa oko ekomakeka,” naap mainen-na yo opora efa miimikuan. Nain yo mua me wia kookalinen-na yo mua makena wia. 3 Ne feenap, yo yena maa unowa aawep wi mua oorpowa wiomakinen-na ne mua papako-ke efa kuumu naep oniwkin wiisiw wiokinen-na, nain yo mua me wia kookalinen-na yo sira eliwa unowa oniyem nain makena me efar arinon.

4 Aria i mua wia kookalowa sira feenap, mua-ko pina yia oneya-na kekelka muuta ikowa, is-keriw wia saliwowa, ne pina wia kiripomowa kema me wuowa, maa unowa kema me wia kuowa. Ne maa mutumut yo yaisow naap yame maemi me yame pirowa. 5 Emina wia ururowowa sira nain me onowa, ne maa me ifemakep ookap iwowa, ne ewur me riirinowa, ne sira samora yia oniwkin-na me wiar kema suuwowa. 6 Ne mua-ko pina aaweya-na me wiar kemelowa ne mua-ko Mua Maneka sira wiar ookeya-na kemelowa. 7 Sira samora yia oniwkin-na me wia maem-miawowa. Ne opora wiar ifemakemi sira eliwa-pa pikiwowa. Neemi maiyen, “Mua Maneka-ke o asipeya Krais sira wiar ookinon.” Naap maep mua nain anane naap asipam-ikowa.

8 Mua wia kookalowa sira nain-ke naap ikainon, maa papako weeserinon. Feenap, aakisa Ewar Eliwa-ke amisa yieya opora kokot ikua nain aakunimik, ne wiimar kiiriw naap me aakuniyen. Ne Ewar Eliwa amisa yieya opora sira onaiya aakunimik nain pun wiimar weeserinon. Ne Ewar Eliwa-ke amisa maneka yieya Mua Maneka opora wia fookomimik uuwowa nain pun wiimar weeserinon. 9 Moram i aakisa maa iiwawun me amisarowa ikemik. Ne Ewar Eliwa-ke amisa yiemi opora kokot ikua nain ara kui-kuisow yia maakeya wiar aakunimik. 10 Ne wiimar Mua Maneka ona maa mutumut maek nain iiwawun ariman wueya i aakisa ara kui-kuisow wiar aakunimik nain opora iiwawun ariman arinon. 11 Feenap saarik, yo iiriw takira ikok aakunowa takir gala opora aakunem-ikem. Ne kema pun naap takir kema ikem, takira maa kookalimik naap onam-ikem ne maa unowa takir kemaiw ikem. Nain aakisa yo arimep mua arep takir kema nain iiwawun piipuam. 12 Aria Mua Maneka opora yia maakek nain pun naap. Fain saarik, eka wiwisa kireya maa baliwep me urufimik. Ne wiimar maa mutumut Mua Maneka-ke iiwawun wasirkeya i eka melina saarik maa baliwep urufap kema pukiyen. Aakisa Mua Maneka amis maneka wiar ikua nain lawiliw muuta wiar amisaremik, ne ikoka iiwawun maneka parinarep amisariyen, ona i baliwep akena yia amisarek naap.

13 Aria aakisa sira arow fain Mua Maneka-ke ookeka yia naeya ookiyen. I Mua Maneka opora kekanowa wiar ookam-ikaiyen. Yeesus Krais opor makena maek nain kemaiw yiam tuupam-ikaiyen, ne pun mua wia kookalem-ikaiyen. Sira arow nain eliwa, nain sira manek akena mua wia kookalowa naneka.